أفكار و خواطر

الوداع لينك إيجيبت ، الوداع عم حسين!

وداعاً لينك إيجيبت

تمر الأيام ، يوماً تلو الآخر … و ها أنا اليوم أنتقل من عملي الحالي في شركة Link Egypt إلى آخر في شركة Tawasol ، قضيت سنتين من عمري في شركة ربطتني علاقات أخوية بين زملائي العاملين بها أكثر من أي شركة أخرى … تعلمت الكثير منهم ، و أتمنى أن أكون قد ساعدت في نجاحها … عشنا سوياً لحظات الفرحة بأيام الثورة … شاركنا سوياً في علاقات إجتماعية لن تنتهي بمغادرتي الشركة … أحببتهم في الله ، جمعنا حب الإنتاج و الرغبة الحقيقية في النجاح … أتمنى من الله تعالى أن يديم بيننا المودة و الألفة و ألا ننسى أيامنا و مواقفنا الجميلة … أتمنى منهم جميعاً أن يسامحنوي ان أخطأت في حق أحدهم و أن يدعوا لي بالتوفيق في عملي الجديد فهو نجاح لنا جميعاً، وقبل أن أودعكم … كلمة لكل منكم: (بالترتيب الأبجدي) 🙂

أحمد وهبة: محاسب الشركة المغوار … انت راجل محترم يا أحمد ، و واد بتاع شغل و مطقطق ومن الآخر ، أنا بحترمك جداً على المستوى الشخصي و بقدرك و بشكرك جداً على مساعدتي في بعض الظروف منها كارت بريميوم على سبيل المثال ، و من الآخر أوصيك ببسمة … متكترش عيار الشغل عليها (فاهمني ؟!) ههههههههههه

بسمة: أنا متعاملتش معاكي بشكل مباشر كتير تقريباً، ومقدرتش أتعرف عليكي على مستوى الشغل ، و لكنك إنسانة محترمة جداً و طموحة و عندك قدرة على الإحتمال لا بأس بها (يارب بس تقدري على أحمد) 😉 أنا جاي أهدى النفوس بس ، ربنا يكرمكم و يوفقكم في حياتكم الزوجية ، و ان شاء الله هاجي أنا و زوجتي الفرح ، إنتم إخوة أعزاء على قلبي

حازم بيك: بص ياض، انت حد حبوب و لذوذ و طيوب و ابن حلال و دماغك نظيفة في شغلك، بس أبوس ايدك ارحم اخوانك المستضعفين في الشركة من محمولك الصيني، وخلي درجة الصوت أقل 4 درجات عن أعلى درجة ، غير كدة تبقى زي العسل … أما بقى على المستوى الشخصي ، أتمنى لك التوفيق في حياتك العاطفية 😀 وربنا يديمها عاطفية و متسمعش نصائح الواد مصطفى عادل في طريقة التعامل مع الجنس الناعم لأنه متأثر بـ 3 سنين اعتقال … ربنا يعافينا يااااارب

عم حسين: و الله مش عارف أقولك ايه يا راجل يا طيب، هتوحشني أيامك ، ربنا يوفقك في شغلك يا عم حسين ، معلش اصبر شوية و صدقني البلد مليانة شباب زي الفل ، هما دول الشباب اللي هيخلوا مصر أحلى و تأكد ان شادي ابنك واحد منهم … من أبطال و جدعان 25 يناير … بالتوفيق يا عم حسين ، هفتقدك ، أكيد مش هلاقي حد زيك في أي مكان تاني أو أي شركة تانية … انت شخصية مميزة عن كل الناس

حنان: أقدم أعضاء الشركة 😀 ، أنا اشتغلت معاكي تقريباً السنتين اللي كنت فيهم في الشركة ، و انتي من أكثر الشخصيات اللي عرفتها جادة و مخلصة في عملها و بتكوني وقت ما تكون الشركة في  أشد الحاجة ليكي ، أتمنى لك التوفيق في حياتك العملية و الشخصية على حد سواء

محمد مروان: زميلي المصمم 🙂 ، على المستوى العملي أنا شايف ان تصميماتك هايلة و انت بتبدع في مجال التصميم أكتر من مجال الديفيلوبمينت ، لكن لو عاوز تدوس أكتر في المجال ده ، لازم تقرأ كتير و تطبق اللي بتقرأه أول بأول ، و ربنا يوفقك أكتر و أكتر يا باشا

مصطفى عادل: جاري العزيز ، تركت مكاني لمن أفضل مني ، و تركتك وحيداً مع سحس بومب ، استحمل بقى 😀 ، أنا بعزك جداً يا مصطفى و أتمنى نتقابل قريباً على خير ، انت من الناس اللي دماغها نظيفة و محترمة جداً

مصطفى عمران: كانت أول مرة في حياتي العملية اني أشتغل مع مدير مشروعات ، و كنت انت هو يا مصطفى ، أي نعم طلعت عيني أحياناً كتير بس اللي أنا متأكد منه إني أنا طلعت عينك أكتر هههههههههه ، حقيقة إنت انسان مهذب و على خلق و اتعلمت منك حاجات كتير على المستوى الشخصي و المهني أتمنى إني أقدر أستخدمها في حياتي

مها: على مدى سنة تقريباً اشتغلت معاكي يا مها في الشركة ، وكنت موفقة الحمد لله في شغلك بشكل كبير ، أنا شايف انك طموحة جداً و عندك قدرة على التعلم السريع … ثابري على التعلم و إكتساب الخبرات ، و أوعدك انك في فترة قصيرة جداً هتكوني حاجة محترمة جداً في مجال شغلك … ملحوظة: اصبري على حازم شوية … زي أخوكي الصغير برضه 😀

نجلاء: جارتي العزيزة و أختي الكبيرة (مش كبيرة قوي يعني) 🙂 ، مش عارف أقولك ايه غير جزاكم الله خيراً كثيراً على اللي كنتي بتعمليه معايا انتي و أيمن ، و كنت أتمنى انك تغيري شغلك للدقي عشان أروح معاكم ههههههههههه ، أكيد بهزر …. المهم أنا نشرفت بإني تعرفت عليكي و على أيمن بشكل شخصي و أكيد المعرفة لن تنتهي بمجرد مغادرتي الشركة ، و لكن هتستمر ان شاء الله بشكل جيد … بالنسبة للحياة العملية ، انتي طيبة مش شريرة 🙂 ، و لكن حاولي بس تتمالكي أعصابك مع أي حد يضايقك سواءً من داخل الشركة 😉 (مقصدش حازم خالص) أو من خارج الشركة (مقصدش أحمد سعيد خالص برضه) و غير كدة هتكوني تمام قوي

هدى: بدون مقدمات كتيرة ، انتي انسانة موهوبة فعلاً و ممكن تنتجي شغل رائع فقط إذا ركزتي في كدة و ابتعدتي عن أي تشتيت ، وبالنسبة لمجال التصوير انتي خليتيني حابب أدخل المجالل ده كهواية جديدة ليا ، و للفترة الجاية أكيد هرجعلك في أسئلة معينة عن المجال ده … بالتوفيق يا هدى

يحيى ثروت: كان من المفترض اني أبدأ لكلامي لك ، و لكن بما ان ثورة 25 يناير بدأت تؤتي ثمارها ، فكان لازم نلغي الواسطة هههههههههه ،حقيقة على مدى سنتين من عمري قضيتهم في الشركة ، كنت حضرتك بتحاول تشعرنا ان لينك ايجيبت كلنا شركاء فيها مش يحيى ثروت بس، بالنسبة ليا أسلوبك في الإدارة اتعلمت منه كتير و تواضعك مع موظفينك فعلاً أكسبك هيبة أكثر ، الحاجة الوحيدة اللي تعبتني فيها الله يسامحك انك مستعجل أخلص التصميم الفلاني و الإعلان التاني و هكذا ….. ههههههه ، لكن مع ذلك أنا أعزك و أحترمك و أعتبرك أخي الكبير بمعنى الكلمة اللي أكيد مش هتكسف منه و ألجأ منه لو عاوز حل لمشكلة ما … و بدون شك ، علاقتنا لن تنتهي مع مغادرتي الشركة ، بالتوفيق يا بشمهندس يحيى و يارب أسمع عنكم خير قريباً أكثر و أكثر

في النهاية، دي بعض الصور و الذكريات الحلوة لي في لينك إيجيبت

Written by admin in April 9, 2011 / 82 Views

3 Comments

  • 7azm bik April 9, 2011 at 1:45 pm

    tslmly ya 2bo nabil we rabna ywaf2k en shaa allah fe 7ayatk elly gayah we tkon afdl we afdl we mn nga7 le naga7
    rabna ywaf2k ya 7oby

    Reply
    • محمد نبيل April 9, 2011 at 1:51 pm

      الله يسلمك يا حازم ، و ربنا يوفقك انت كمان في حياتك العملية و الشخصية على حد سواء

      Reply
  • 7azm bik April 9, 2011 at 1:47 pm

    ysharfny any a2kon a2wl wa7d y3lk 3ala el maqal bta3k

    Reply
  • Please Post Your Comments & Reviews

    Your email address will not be published. Required fields are marked *